திருவள்ளூர்: நாம் தமிழர் கட்சியின் தலைமை ஒருங்கிணைப்பாளர் சீமான், இயற்கை மற்றும் சுற்றுச்சூழல் பாதுகாப்பை மையமாகக் கொண்டு “மரங்களோடு பேசுவோம்” என்ற கருப்பொருளில் இன்று மாநாட்டை நடத்தியுள்ளார்.

தமிழ்நாடு-ஆந்திரா எல்லையில், திருவள்ளூர் மாவட்டம் திருத்தணி அருகே அருங்குளம் கிராமத்தில் செம்மரங்கள் நிறைந்த காட்டுப் பகுதியில் நடைபெற்ற இந்த மாநாட்டில், சீமான் மரங்களின் முக்கியத்துவம் மற்றும் சுற்றுச்சூழல் பாதுகாப்பு குறித்து விரிவாக உரையாற்றினார்.

இந்த நிகழ்ச்சியில் பேசிய சீமான்,

“மரங்கள் வெட்டப்படுவதால் பருவநிலை மாறி வருகிறது. இனி இந்த மண்ணில் பருவமழை, பெருமழை இல்லை; புயல் மழை மட்டுமே உள்ளது. புவி வெப்பமாதலால் பூமியின் வெப்பம் அதிகரித்து, கடல் பொங்கி கொந்தளிக்கும் நிலை உருவாகிறது. கடந்த காலத்தில் ஒரு சுனாமியையே தாங்க முடியவில்லை. இதே போக்கு நீடித்தால், பூமி பேரழிவை சந்திக்கும்,” என எச்சரித்தார்.

மேலும், “நான் ஆட்சிக்கு வந்தால், ஒவ்வொரு பிறந்தநாளிலும் ஒரு குழந்தை மரம் நட வேண்டும் என கட்டாயமாக அறிவிப்பேன். பள்ளி மாணவர்கள் பத்து மரங்கள் நட்டால் தேர்வில் 10 மதிப்பெண்கள் வழங்குவேன். 100 மரங்கள் நட்டவர்களுக்கு ‘சிறந்த தமிழ் தேசிய குடிமகன்’ என்ற சான்றிதழ் வழங்கப்படும். வேலை வாய்ப்பிலும் முன்னுரிமை அளிக்கப்படும். 1,000 மரங்கள் நட்டவர்களுக்கு இறுதி சடங்கில் அரசு மரியாதை வழங்கப்படும். மக்கள் மரம் நடுவதற்கு ஊக்கத் தொகையும் வழங்கப்படும்,” என்றார்.

அதோடு, “சொந்த வீடாக இருந்தாலும் அங்குள்ள மரத்தை வெட்ட வேண்டுமென்றால் அரசின் அனுமதி பெற வேண்டும். ஒரு கிளையை வெட்டினால்கூட, அது மனித கையை வெட்டுவதைப் போன்ற குற்றம் என்பதால், 6 மாதம் சிறைத் தண்டனை விதிக்கப்படும்,” என வலியுறுத்தினார்.

கூடுதலாக, தனது உரையில் அரசியல் விமர்சனத்தையும் முன்வைத்த சீமான்,

“காட்டில் புலிகள் நுழைந்தவுடன் ஒரு அணிலை கூட காணவில்லை; அணில்களுக்கும் சேர்த்துதான் மரங்களின் மாநாடு. நாட்டுக்காக நிற்பவர்களால்தான் மாநாடு நடத்த முடியும்; ஓட்டுக்காக நிற்பவர்களால் முடியாது” எனக் கடுமையாக தாக்கினார்.