தூத்துக்குடி:சுதந்திரப் போராட்ட தலைவர் வ.உ.சிதம்பரனார் 89ஆம் ஆண்டு நினைவு நாளை முன்னிட்டு, தூத்துக்குடி பழைய மாநகராட்சி அலுவலக வளாகத்தில் உள்ள அவரது சிலைக்கு இன்று மாலை அணிவித்து மரியாதை செலுத்தும் நிகழ்வு நடைபெற்றது. வடக்கு மாவட்ட திமுக செயலாளரும், சமூகநலன் மற்றும் மகளிர் உரிமைத்துறை அமைச்சருமான கீதாஜீவன், தூத்துக்குடி மாநகராட்சி மேயர் ஜெகன் பெரியசாமி ஆகியோர் மாலை அணிவித்து மரியாதை செலுத்தினர்.

நிகழ்வில் மாநகரச் செயலாளர் ஆனந்தசேகரன், துணைச் செயலாளர்கள் ராஜ்மோகன்செல்வின், புளோரன்ஸ், கஸ்தூரிதங்கம், கீதாமுருகேசன், அந்தோணிஸ்டாலின், கவிதாதேவி, குபீர் இளம்பதி, பிரபு, கண்ணன், சின்னத்துரை, சோமநாதன், ஜேசையா உள்ளிட்ட பல்வேறு அணிச் செயலாளர்கள், கவுன்சிலர்கள், வட்டச்செயலாளர்கள், மாவட்டத் தலைவர்கள் மற்றும் பொதுக்குழு உறுப்பினர்கள் உள்ளிட்ட பலர் கலந்து கொண்டனர்.

அபூர்வ காட்சி: திமுக–அதிமுக தலைவர்கள் பரஸ்பர கும்பிட்டு மரியாதை

அதே நேரத்தில் தெற்கு மாவட்ட அதிமுக செயலாளரும் முன்னாள் அமைச்சருமான எஸ்.பி. சண்முகநாதனும் நினைவு நாளை முன்னிட்டு வந்திருந்தார். அமைச்சர் கீதாஜீவன் மற்றும் மேயர் ஜெகன் பெரியசாமி மாலை அணிவித்து கீழே இறங்கும் வேளையில், தமிழக பாரம்பரியத்தைப் பேணும் விதமாக முன்னாள் அமைச்சர் சண்முகநாதன் கும்பிட்டு மரியாதை செலுத்தினார்.

இதற்கு பதிலளித்து அமைச்சர் மற்றும் மேயரும் கும்பிட்டு மரியாதை தெரிவித்தனர். பின்னர் இரு தரப்பினரும் கை குலுக்கி நலம் விசாரித்தனர்.

இந்நிகழ்வு அங்கிருந்த அனைவர் மத்தியிலும் பேசுபொருளாக அமைந்தது.