தூத்துக்குடி வ.உ.சி. சந்தையில் மண்ணில் புதைந்துள்ள ஜெ.எல்.பி. ரோச் விக்டோரியா கல்வெட்டை சுவரில் பதிக்க வேண்டும் என்று நெய்தல் எழுத்தாளர்கள் வாசகர்கள் இயக்கம் மேயரிடம் கோரிக்கை மனு அளித்துள்ளது.
தூத்துக்குடி நகர சபையில் தொடர்ந்து ஐந்து முறை நகர மன்றத் தலைவராகவும், சட்ட மன்ற உறுப்பினராகவும், மேலவை உறுப்பினராகவும், ஒருங்கிணைந்த தமிழகத்தின் உணவு அமைச்சராகவும் பணியாற்றிய ஜெ.எல்.பி. ரோச் விக்டோரியா, தூத்துக்குடி மக்களுக்காக அரசு மருத்துவமனை, நகராட்சி அலுவலகக் கட்டடம், வல்லநாடு குடிநீர்த் திட்டம், ரோட்டரி கிளப், புதிய துறைமுகம், வ.உ.சி. சந்தை உள்ளிட்ட பல பொதுநலத்திட்டங்களை உருவாக்கியவர்.அவரின் பணிகளை நினைவுகூர வ.உ.சி. சந்தையின் வாயிலில் “ஜெ.எல்.பி. ரோச் 12.4.1938 அன்று திறந்தார்” என்ற கல்வெட்டு நிறுவப்பட்டுள்ளது. ஆனால், அச்சந்தையின் முன்புள்ள சாலையின் தரை மட்டம் உயர்ந்து விட்டதால் அந்த கல்வெட்டு பாதியாக மண்ணில் புதைந்துள்ளதாக தெரிவிக்கப்பட்டுள்ளது. இதனால், அக்கல்வெட்டை வெளியே எடுத்துச் சுவரில் பதிக்க நடவடிக்கை எடுக்குமாறு கோரப்பட்டுள்ளது.
மேலும், பழைய மாநகராட்சி அலுவலகம் அருகிலுள்ள சின்னக் கோவில் வளாகத்தில் அஞ்சல் நிலையமும் நான்கு பள்ளிகளும் உள்ளன. பள்ளிக் குழந்தைகள் நலன் கருதி, கோவிலின் முதன்மை நுழைவு வாயில் முன்பு ரவேல்ஸ் சவுண்ட்ஸ் அருகே வேகத்தடை ஒன்றை அமைத்துத் தரும்படியும் கோரிக்கை விடுக்கப்பட்டுள்ளது. இந்த மனுவை நெய்தல் எழுத்தாளர்கள் வாசகர்கள் இயக்கத்தின் ஒருங்கிணைப்பாளர் எழுத்தாளர் தமிழ்ச்செம்மல் நெய்தல் அண்டோ மேயர் ஜெகன் பெரியசாமி அவர்களுக்கு வழங்கினார்.அப்போது ஆசிரியர் சேவியர் புர்னோ, சிபின் ஜார்ஜ் ஆகியோர் உடனிருந்தனர்.மேலும் இது குறித்து விரைவில் நடவடிக்கை எடுக்கப்படும் என மேயர் உறுதியளித்தார்.
