தூத்துக்குடி:அமெரிக்கா விதித்துள்ள புதிய 50% சுங்க வரி காரணமாக, தூத்துக்குடி கடலுணவு ஏற்றுமதியாளர்கள் அனுப்பிவைத்துள்ள கடல் உணவான இறால் மற்றும் கணவாய் மீன்கள் செல்லும் துறைமுகம் செல்ல முடியாமல் நடுக்கடலில் சிக்கியுள்ளார்கள். ஏற்கனவே ஆர்டர் செய்யப்பட்ட சுமார் 1,000 டன் (100 கோடி ரூபாய் மதிப்பு) கடலுணவு கப்பல் குளிர்சாதன பெட்டிகளில் அமெரிக்காவை நோக்கி அனுப்பப்பட்டு, தற்போது கடலில் சிக்கிக் கிடக்கின்றன.
அமெரிக்க அதிபர் டொனால்ட் டிரம்ப் விதித்துள்ள 50% சுங்க வரி ஆகஸ்ட் 27-ஆம் தேதி முதல் அமலுக்கு வந்த நிலையில், வாங்குபவர்கள் ஏற்றுமதியாளர்களை “கூடுதல் வரியை நீங்கள் தான் ஏற்க வேண்டும், இல்லையெனில் சரக்குகளை திருப்பி அனுப்புங்கள்” என்று மின்னஞ்சல் மூலம் அழுத்தம் கொடுத்து வருவதாக, இந்திய கடலுணவு ஏற்றுமதியாளர் சங்கம் (SEAI) – தமிழ்நாடு பிரிவு தலைவர் செல்வின் பிரபு தெரிவித்தார்.
மேலும் தூத்துக்குடியிலிருந்து கடல் உணவாக வெள்ளை இறால், கணவாய்,ஆக்டோபஸ் போன்றவை அதிகளவில் ஏற்றுமதி செய்யப்படுகின்றன. இதில் இறால் ஏற்றுமதி 85% ஆகும்.
ஏற்றுமதியாளர்களின் பிரச்சினை;
- அமெரிக்க துறைமுகங்களுக்கு சரக்கு செல்வதற்கு சுமார் 45 நாட்கள் ஆகிறது.
- ஆகஸ்ட் 6 வரை அனுப்பிய சரக்குகளுக்கு 10% வரி இருந்தது.
- ஆகஸ்ட் 26 வரை 25% வரி வசூலிக்கப்பட்டது.
- ஆகஸ்ட் 27 முதல் மொத்தம் 50% சுங்கவரி விதிக்கப்பட்டுள்ளது.
- அதற்கு மேல், இறாலுக்கு (Shrimp) கூடுதலாக 8.5% வரி விதிக்கப்படுகிறது
இந்திய கடலுணவு ஏற்றுமதி வளர்ச்சி & சரிவு;
- 2020: ₹43,717 கோடி மதிப்பிலான ஏற்றுமதி (COVID-19) (காரணமாக குறைவு).
- 2021: ₹46,662 கோடி – சிறிய அளவில் மீட்பு.
- 2022: ₹57,587 கோடி – வரலாற்றில் அதிகபட்சம்.
- 2023: ₹63,969 கோடி – 7.37 லட்சம் டன் (Shrimp alone 5 லட்சம் டன்).
- 2024 (ஜூலை வரை): ஏற்றுமதி அளவில் 4% சரிவு, வருவாயில் 8%குறைவு.
இந்த சரிவின் முக்கிய காரணங்கள்:
1. அமெரிக்கா & ஐரோப்பிய சந்தைகளில் அதிக சுங்கவரி.
2. ரஷ்யா எண்ணெய் இறக்குமதிக்கான தண்டனைகள் காரணமாக இந்தியாவுக்கு விதிக்கப்பட்ட கூடுதல் வரி.
3. உலகளாவிய பொருளாதார மந்தநிலை – வாடிக்கையாளர்கள் குறைந்த கொள்முதல்.
4. விலைப் போட்டியில் வியட்நாம், எக்வடார், தாய்லாந்து போன்ற நாடுகள்முன்னிலை.
இந்தியாவில் சுமார் 12 லட்சம் மக்கள் நேரடியாகவும், 25 லட்சம் பேர் மறைமுகமாகவும் கடலுணவு தொழிலில் ஈடுபட்டுள்ளனர். அமெரிக்க சந்தை தடைகள் தொடர்ந்தால், ஆயிரக்கணக்கானோர் வேலை இழக்கும் அபாயம் உள்ளது.
தூத்துக்குடி ஏற்றுமதியாளர்கள் தற்போது அமெரிக்க சந்தை சார்பு குறைக்க ஜப்பான், சீனா, மத்திய கிழக்கு, ஐரோப்பா போன்ற புதிய சந்தைகளை நோக்கிச் செல்லும் வாய்ப்பு ஆராய்ந்து வருகின்றனர். ஆனால் அமெரிக்க சந்தை தவிர்க்க முடியாத ஒன்று என்பதால், மத்திய அரசு விரைவில் தலையிட்டு தீர்வு காண வேண்டும் என்பது ஏற்றுமதியாளர்களின் கோரிக்கையாக உள்ளது.
