தூத்துக்குடி: மழைமானிகள் பராமரிப்பில் அலட்சியம் — நீர் மேலாண்மை, பேரிடர் தடுப்பில் பாதிப்பு: பாஜக மாவட்ட ஊடகப் பிரிவு குற்றச்சாட்டு

தூத்துக்குடி தெற்கு மாவட்டத்தில் கிராம ஊராட்சிகள் மற்றும் நீர்வளத் துறையின் கட்டுப்பாட்டில் உள்ள மழைமானிகள் (Rain Gauges) பல ஆண்டுகளாகச் சரியாகப் பராமரிக்கப்படாமல் இருப்பது குறித்து கடும் குற்றச்சாட்டுகள் எழுந்துள்ளன. இதனால் நீர் மேலாண்மை, விவசாய திட்டமிடல் மற்றும் பேரிடர் முன்னெச்சரிக்கை செயல்பாடுகளில் பெரிய அளவில் பின்னடைவு ஏற்பட்டுள்ளதாக பாஜக தெற்கு மாவட்ட ஊடகப் பிரிவு தலைவர் ஆர். ஜெயக்குமார் தெரிவித்துள்ளார்.

அலட்சியமான கண்காணிப்பு

மழைத் தரவுகளைத் துல்லியமாக அளக்க மழைமானிகள் மிகவும் முக்கியமானவை. ஆனால் தென் தமிழகத்தின் பல கிராமங்களில் நிறுவப்பட்ட மழைமானிகள் சரியாகக் கண்காணிக்கப்படுவதில்லை என்று ஜெயக்குமார் குற்றம்சாட்டினார்.

தூத்துக்குடி மாவட்டத்தில் பல இடங்களில் மழைமானிகளின் அளவீட்டுக் குடுவைகள் சேதமடைந்துள்ளன. புனல் பகுதிகள் பராமரிக்கப்படாததால் அதிகாரிகள் சரிவர அணுகவும் முடியவில்லை. இது மிகப்பெரிய அலட்சியம்,” என்றார்.

களைகளால் சூழ்ந்த மழைமானிகள்

பல மழைமானிகள் அடர்ந்த களைகளால் மூடப்பட்டிருப்பதால், நியமிக்கப்பட்ட ஊழியர்கள் அளவீடுகளை எடுக்கச் செல்லத் தயக்கம் காட்டுவதாகவும், இதனால் தவறான தகவல்கள் பதிவாகும் அபாயம் இருப்பதாகவும் அவர் தெரிவித்தார்.

தானியங்கி மழைமானிகளும் செயலிழந்த நிலை

சில பகுதிகளில் நிறுவப்பட்ட தானியங்கி மழைமானிகளும் (Automatic Rain Gauges) கூட செயலிழந்து காணப்படுவதாக ஜெயக்குமார் குறிப்பிட்டார். தொழில்நுட்ப பணியாளர்கள் பற்றாக்குறையால் முக்கிய மழைக்காலங்களில் ரியல்-டைம் தரவுகள் கிடைக்கவில்லை என அவர் கண்டனம் தெரிவித்தார்.

நீர் மேலாண்மையில் பெரிய பாதிப்பு

மழைத் தரவுகள் துல்லியமாக இல்லாவிட்டால் நீர் சேமிப்பு திட்டங்கள், விவசாய திட்டமிடல், அணை மேலாண்மை போன்றவை பாதிக்கப்படும் என்று ஜெயக்குமார் எச்சரித்தார்.“தாமிரபரணி நீர் மேலாண்மைக்குத் துல்லியமான மழைத் தரவுகள் அத்தியாவசியம். இதில் அலட்சியம் காட்டப்படுவது முழு மாவட்டத்திற்கும் அபாயம்,” என அவர் வலியுறுத்தினார்.

இதுகுறித்து அதிகாரிகள் உடனடி ஆய்வு செய்து பராமரிப்பு பணிகளை தீவிரப்படுத்த வேண்டும் என அவர் கோரிக்கை வைத்தார்.