தூத்துக்குடி மாவட்டத்தில் முத்துலாபுரம், தோல்மலைப்பட்டி , கருப்பூர் , கடலையூர் சாலை மற்றும் கருப்பசாமி கோவில்பட்டி , வீரப்பட்டி , மலைப்பட்டி , கோவில்பட்டி சாலை உள்ளிட்ட பல முக்கிய சாலைகள் மோசமான நிலையில் உள்ளதால் பொதுமக்கள் அவதிப்படுகின்றனர்.
மாநில நெடுஞ்சாலை துறையின் கட்டுப்பாட்டில் உள்ள இச்சாலைகள் வழியாக பள்ளி, கல்லூரி, மருத்துவமனை, சந்தை உள்ளிட்ட இடங்களுக்கு பொதுமக்கள், மாணவர்கள், விவசாயிகள் தினமும் பயணம் செய்கின்றனர். ஆனால் கடந்த ஐந்து ஆண்டுகளாக பராமரிப்பு செய்யாததால் சாலைகள் பல இடங்களில் ஆழமான பள்ளங்களாக மாறியுள்ளன.
கிணறு போல் நீர் தேங்கிய சாலை
மழை பெய்தாலே கிணறு போல் நீர் தேங்கி வாகனங்கள் செல்வதற்கு முடியாத நிலை ஏற்படுகிறது.
இதனால் வாகன ஓட்டிகள் பெரும் சிரமத்திற்குள்ளாகி வருகின்றனர். அவசரநேரங்களில் கர்ப்பிணி பெண்கள் மருத்துவமனைக்குச் செல்ல கூட வாடகை வாகனங்கள் வர மறுக்கின்றன என்று கிராம மக்கள் கூறுகின்றனர். மேலும் மோசமான சாலை காரணமாக அரசு பேருந்துகளும் அடிக்கடி சேவையை நிறுத்துகின்றன.
“பொதுமக்கள் நலனைக் கருத்தில் கொண்டு முத்துலாபுரம் – தோல்மலைப்பட்டி – கடலையூர் சாலை விரைவில் சீரமைத்து புதிய தார்ச்சாலை அமைக்க அரசு நடவடிக்கை எடுக்க வேண்டும்,” என கரிசல் தலைவர் அ. வரதராஜன் கோரிக்கை விடுத்துள்ளார்.
