தூத்துக்குடி மாநகராட்சி சாதாரண கூட்டம் மாநகராட்சி கூட்ட அரங்கில் மேயர் ஜெகன் பொியசாமி தலைமையில் நடைபெற்றது, ஆணையர் எஸ்.பிரியங்கா, துணை மேயர் செ.ஜெனிட்டா முன்னிலை வகித்தனர்.

விவாதம் தொடங்கு முன்னதாக கரூரில் எதிர்பாராத விதமாக நடைபெற்ற துயர சம்பவத்தால் உயிரிழந்தவர்களுக்கு 1 நிமிடம் மௌன அஞ்சலி செலுத்தப்பட்டது.

அதனை தொடர்ந்து மேயர் ஜெகன் பெரியசாமி பேசுகையில்;

தூத்துக்குடியில் மழைக்காலம் ஆரம்பமாகி உள்ளது. மாநகரின் 60 வார்டுகளில் அனைத்து பகுதிகளிலும் சாலை, வடிகால் முழுமையாக அமைக்கப்பட்டுள்ளது, ஏற்கனவே 420 சாலைகள் அமைக்கப்பட்ட நிலையில் கூடுதலாக 400 சாலைகள் விரைவில் அமைக்கப்பட உள்ளது. பாதாள சாக்கடை பணிகள் சிறப்பாக செயல்படுத்தப்படுகிறது. மாநகரின் 14 வழித்தடங்கள் வழியாக மழைவெள்ளநீர் வெளியேற வழி வகை செய்யப்பட்டுள்ளது. நகருக்குள் இருக்கும் பக்கிள் ஓடை முழுமையாக சீரமைக்கப்பட்டுள்ளது. மேலும் சவேரியான மைதானம் அருகில் உள்ள கால்வாய், ஸ்டேட் பேங்க் காலனி 60 அடி சாலை கால்வாய், மற்றும் பைபாஸ் சாலை பர்னிச்சர் பூங்கா அருகில் இருந்து புதிய நீரோடை அமைக்கப்பட்டு நிலா சி ஃபுட் வழியாக கடலுக்கு செல்லும் வகையில் உருவாக்கியுள்ளோம். மேலும் கலெக்டர் அலுவலகம் பின்புறம் உள்ள செங்குளம் நீர்பாதை , எப்சிஐ குடோன் அருகில் உள்ள கால்வாய், போல்டன் புரம், பக்கிள்புரம், சிவந்தாகுளம் பகுதி வழியாக மழைநீர் கால்வாய் திருச்செந்தூர் ரோடு அன்னம்மாள் காலேஜ் வழியாக கடலுக்கு செல்லும் வகையில் அமைக்கப்பட்டு உள்ளது. கோரம்பள்ளம் குளத்திலிருந்து உபரிநீர் வெளியேற துறைமுகம் விரைவுச் சாலை வழியாக கடலுக்கு செல்லும் வகையிலும், முள்ளக்காடு பகுதியிலும் மழைநீர் கடலுக்கு செல்லும் வகையில் அமைக்கப்பட்டு உள்ளது. குடியிருப்பு பகுதிகளில் உள்ள வடிகால்களில் தங்கியுள்ள கழிவுகள் மண்  திட்டுகள் முழுமையாக அகற்றப்பட்டுள்ளது. எனவே தூத்துக்குடி மாநகரில் மழைக் காலத்தை சுலபமாக சமாளிப்பதற்கு, மாநகராட்சி நிர்வாகம் அனைத்து பணிகளையும் முடுக்கிவிட்டுள்ளது. 

மாநகர பகுதிகளில் 21759  தெரு விளக்குகள் அமைக்கப்பட்டுள்ளது;

தூத்துக்குடி மாநகராட்சி பகுதிகளில் 206 பூங்கா இடங்கள் இருந்தாலும் 53 பூங்காக்கள் மட்டுமே பொதுமக்கள் பயன்பாட்டில் இப்பொழுது நடைமுறையில் உள்ளது. மேலும் வரும் தைப்பொங்கலுக்குள் மேலும் கூடுதலாக பூங்காக்கள் மக்கள் விருப்பத்திற்கு ஏற்ப நவீன உடற்பயிற்சிகளுடன் சிறு விளையாட்டு திடல் அமைக்கப்படும், மாநகர பகுதிகளில் 21759  தெரு விளக்குகள் அமைக்கப்பட்டு பராமரிக்கப்பட்டு வருகிறது என தெரிவித்த மேயர் ஜெகன் பெரியசாமி;  வரும் எதிா்கால தலைமுறையினர் நலன் கருதி சுற்றுச்சூழல் பாதுகாப்பு, சுகாதாரம் உள்ளிட்ட பல பணிகளை கருத்தில் கொண்டு பணியாற்றி வருகிறோம். இதற்கு அனைவரும் ஒத்துழைப்பு வழங்க வேண்டும் என மேயர் ஜெகன் பெரியசாமி கேட்டுக்கொண்டார்.

கூட்டத்தில் தெற்கு மண்டல தலைவர் பால குருசாமி, கவுன்சிலா்கள் இசக்கி ராஜா, சந்திரபோஸ், மும்தாஜ், ராஜதுரை ஆகியோர் தங்களது பகுதியில் நிறைவேற்ற வேண்டிய அங்கன்வாடி பாதாள சாக்கடை, வடிகால் பணிகளை சுட்டிக்காட்டி பேசினர். பின்னர் நிறைவேற்றப்பட்ட சாலை கால்வாய் பூங்கா பணிகளுக்கு நன்றி தெரிவித்தனர்.

கூட்டத்தில் மாநகராட்சி மண்டலத் தலைவர்கள் பாலகுருசுவாமி, அன்னலட்சுமி, நிா்மல்ராஜ், கலைச்செல்வி, பொறியாளர் தமிழ்செல்வன், உதவி பொறியாளா் சரவணன், நகரஅமைப்பு திட்ட உதவி செயற்பொறியாளர்கள் காந்திமதி, முனீர்அகமது, நகா்நல அலுவலா் சரோஜா, உதவி ஆணையர்கள் கல்யாண சுந்தரம், பாலமுருகன், சுகாதார ஆய்வாளா்கள் ஸ்டாலின் பாக்கியநாதன், ராஜசேகா், ராஜபாண்டி, நெடுமாறன், மற்றும் மாமன்ற உறுப்பினர்கள் உள்பட துறை அலுவலா்கள் கலந்து கொண்டனா். இன்றைய கூட்டத்தில் 18 தீர்மானங்கள் நிறைவேற்றப்பட்டன.