தூத்துக்குடி மாவட்டம் வல்லநாடு பகுதியில் உள்ள பேருந்து நிலையம் அருகில், கருங்குளம் ஊராட்சி ஒன்றியம் சார்பில் ரூ.2 லட்சம் மதிப்பீட்டில் 2022–2023 ஆம் ஆண்டில் பொதுமக்கள் பயன்பாட்டிற்காக பொதுக் கழிப்பிடம் ஒன்று கட்டப்பட்டது.ஆனால், இதுவரை அந்தக் கழிப்பிடம் பொதுமக்கள் பயன்பாட்டிற்கு திறக்கப்படாமல் உள்ளது. தண்ணீர் டேங்க் உள்ளிட்ட வசதிகள் அமைக்கப்படாததால் கட்டுமானப் பணியும் முழுமையாக முடிவடையவில்லை என்று கூறப்படுகிறது.
இந்த நிலை குறித்து இன்று (அக்டோபர் 11) கஸ்பா பகுதியில் நடைபெற்ற கிராம சபை கூட்டத்தில், பாஜக நிர்வாகி நங்கமுத்து மற்றும் சமூக ஆர்வலர் பாலு ஆகியோர், “இந்த பொதுக் கழிப்பிடத்தை உடனடியாக பொதுமக்கள் பயன்பாட்டிற்கு கொண்டு வர வேண்டும்” எனக் கோரிக்கை வைத்தனர்.
இதனைத் தொடர்ந்து, கிராம சபையில் விரைவில் பொதுமக்கள் பயன்பாட்டிற்கு திறக்க ஏற்பாடு செய்யப்படும் என தீர்மானம் நிறைவேற்றப்பட்டது.
