கோவில்பட்டி,நெல்லை-சென்னை வந்தே பாரத் ரயில் வரும் அக்டோபர் 29 முதல் கோவில்பட்டியில் நின்று செல்ல தொடர் முயற்சி எடுத்த தூத்துக்குடி எம்.பி., கனிமொழிக்கு, சமூக நலன் மற்றும் மகளிர் உரிமைத்துறை அமைச்சர் கீதாஜீவன் நன்றி தெரிவித்துள்ளார்.

இது குறித்து துாத்துக்குடி வடக்கு மாவட்ட திமுக செயலாளரும், சமூக நலன் மற்றும் மகளிர் உரிமைத்துறை அமைச்சருமான கீதாஜீவன் வெளியிட்டுள்ள அறிக் கையில் தெரிவித்திருப்பதாவது;

நெல்லையில் இருந்து சென்னைக்கு பகல் நேரத்தில் சென்று திரும்பும் விதமாக வந்தே பாரத் ரயில் சேவை கடந்த 2023ம் ஆண்டு செப்டம்பர் மாதம் 24ம் தேதி துவங்கப்பட்டது. இந்த ரயில் சேவை துவங்குவதற்கு இரண்டு நாட்களுக்கு முன்பே தென்னக ரயில்வே பொது மேலாளருக்கு 22.9.2023 தேதியிட்ட கடிதத்தின் மூலம் தூத்துக்குடி நாடாளுமன்ற உறுப்பினர் கனிமொழி கருணாநிதி, தீப்பெட்டி தொழில் உள்ளிட்ட பல்வேறு தொழில் வளர்ச்சி சார்ந்த நகரமாக கோவில்பட்டி திகழ்வதாகவும், கோவில்பட்டி மற்றும் அதன் சுற்று வட்டார பகுதிகளை சேர்ந்த தொழில் முனைவோர் மற்றும் பொதுமக்களுக்கு போக்குவரத்து மையமாக இருக்கும் கோவில்பட்டியில் வந்தே பாரத் உள்ளிட்ட 6 விரைவு ரயில்கள் நின்று செல்ல வழிவகை செய்யுமாறும் கோரிக்கை விடுத்திருந்தார்.

மேலும் ஒன்றிய ரயில்வே அமைச்சர் அஸ்வினி வைஷ்ணவிடம் இது குறித்து தொடர்ந்து நேரில் வலியுறுத்தி வந்தார். கனிமொழி எம்.பி, யின் தொடர் கோரிக்கை மற்றும் முயற்சிகளின் விளைவாக தற்போது தென்னக ரயில்வே நெல்லை – சென்னை நெல்லை வந்தே பாரத் ரயில் எண் : 20666) அக்டேபர் 29ம் தேதி முதல் இரு மார்க்கத்திலும் கோவில்பட்டி ரயில் நிலையத்தில் நின்று செல்லும் என்று அறிவித்துள்ளது.

இதனால் கோவில் பட்டி மற்றும் அதன் சுற்று வட்டாரப் பகுதிகளைச் சேர்ந்த தீப்பெட்டி தொழில் உள்ளிட்ட பல்வேறு தொழில் முனைவோர்கள், பொதுமக்கள் மிகுந்த பயனடைவார்கள்.

தொகுதி மக்களின் நலனுக்காக நெல்லை- சென்னை நெல்லை வந்தே பாரத் ரயில் கோவில் பட்டியில் நின்று சென்றிட முயற்சி எடுத்த தி.மு.க. துணைப் பொதுச் செயலாளரும், துாத்துக்குடி தொகுதி நாடாளுமன்ற உறுப்பினர் கனிமொழி கருணாநிதிக்கு மக்கள் சார்பில் நன்றி தெரிவித்துக் கொள்கிறேன் என அமைச்சர் கீதாஜீவன் அறிக்கையில் தெரிவித்துள்ளார்.