By,CN, அண்ணாதுரை
தூத்துக்குடியில் கட்டப்பட்டு வரும் பல்நோக்கு மருத்துவமனை, பெருமாள் கோவில் வளர்ச்சித்திட்டப் பணிகளை சட்டமன்ற மதிப்பீட்டு குழுவினர் ஆய்வு செய்தனர்.
தமிழ்நாடு சட்டமன்றப் பேரவையின் மதிப்பீட்டுக் குழு தலைவர் காந்திராஜன் தலைமையில் தமிழ்நாடு சட்டமன்றப் பேரவையின் மதிப்பீட்டுக் குழு உறுப்பினர்கள் இராமநாதபுரம் சட்டமன்ற உறுப்பினர் காதர்பாட்சா முத்துராமலிங்கம், வாசுதேவநல்லூர் சட்டமன்ற உறுப்பினர் டாக்டர் சதன் திருமலைக்குமார், ஆரணி சட்டமன்ற உறுப்பினர் சேவூர்.எஸ்.இராமச்சந்திரன், சங்கரன்கோவில் சட்டமன்ற உறுப்பினர் ராஜா, தர்மபுரி சட்டமன்ற உறுப்பினர் எஸ்.பி.வெங்கடேஸ்வரன் ஆகியோர் தூத்துக்குடி மாவட்டத்தில் நடைபெற்று வரும் பல்வேறு பணிகளை ஆய்வு செய்தனர்.
சட்டமன்றப் பேரவையின் மதிப்பீட்டுக் குழுவினர் தூத்துக்குடி அரசு மருத்துவக் கல்லூரி வளாகத்தில் புதிதாக ரூபாய் 136 கோடி மதிப்பீட்டில் 29840 சதுர மீட்டரில் கட்டப்பட்டு வரும் பல்நோக்கு மருத்துவமனை கட்டிட பணிகளை ஆய்வு செய்தனர். அங்கு 7 தளங்களுடன் 650 படுக்கை வசதிகளுடன் 4 லிப்ட்கள் அமைக்கப்பட்டு கட்டப்பட்டு வருகிறது.
இதில், ரேடியோ நோயறிதல், கதிர்வீச்சு புற்றுநோயியல், மத்திய ஆய்வகம், சிஎஸ்எஸ்டி, மருந்தகம், கார்டியாலஜி – கார்டியோ தொராசிக் சர்ஜரி – கேத் ஐசியூ, நரம்பியல் அறுவை சிகிச்சை, சிறுநீரகம் மற்றும் சிறுநீரகவியல், மருத்துவ – அறுவை சிகிச்சை, இரைப்பை குடல், மருத்துவ – அறுவை சிகிச்சை, புற்றுநோயியல் பிளாஸ்டிக் அறுவை சிகிச்சைஆபரேஷன் தியேட்டர்கள் மற்றும் அறுவை சிகிச்சைக்குப் பின் நோயாளிகள் வார்டுகள் ஆகியவை கட்டப்பட்டு வருகிறது.
இக்கட்டிடத்தின் கட்டுமான பணிகளை தமிழக சட்டமன்ற மதிப்பீட்டு குழு தலைவர் காந்தி ராஜன் தலைமையில் குழுவினர் ஆய்வு மேற்கொண்டனர். அப்போது பணிகளை மேற்கொண்ட சட்டமன்ற மதிப்பீட்டு குழுவினர் பணிகளை விரைந்து முடிக்க அதிகாரிகளுக்கு உத்தரவிட்டனர்.
தொடர்ந்து, தூத்துக்குடி சிவன் கோவில், பெருமாள் கோவிலில் ஆய்வு மேற்கொள்ள வந்த குழுவினருக்கு கோவில் நிர்வாகம் சார்பில் மரியாதை செலுத்தப்பட்டது. மேலும் பெருமாள் கோவிலில் 4 கோடி ரூபாய் மதிப்பில் கல் கட்டிட பணிகளை ஆய்வு மேற்கொண்டார். அதன்பின் மாவட்டம் முழுவதும் பல்வேறு பகுதிகளில் இக்குழுவினர் தொடர்ந்து ஆய்வுகளை மேற்கொண்டு வருகின்றனர்.
ஆய்வின் போது, மாவட்ட ஆட்சியர் இளம்பகவத், சட்டப்பேரவை முதன்மை செயலாளர் சீனிவாசன், மாவட்ட காவல் கண்காணிப்பாளர் ஆல்பர்ட் ஜான், மாநகராட்சி ஆணையர் மதுபாலன், அரசு மருத்துவக் கல்லூரி முதல்வர் சிவக்குமார் உறைவிட மருத்துவர் சைலஸ் ஜெபமணி , சிவன் கோவில் தலைமை பட்டர் செல்வம், தூத்துக்குடி சிவன் கோவில் அறங்காவலர் குழு தலைவர் கந்தசாமி, சிவன் கோயில் நிர்வாக அலுவலர் தமிழ்ச்செல்வி, மாவட்ட செய்தி மக்கள் தொடர்பு செய்தி மக்கள் தொடர்பு அலுவலர் நவீன் பாண்டியன் உள்ளிட்டோர் உடன் இருந்தனர்.
