தூத்துக்குடி மாவட்டம் திருச்செந்தூர் வட்டம் குலசேகரப்பட்டினத்தில், நாட்டின் இரண்டாவது பெரிய ராக்கெட் ஏவுதளம் அமைக்கும் பணிகள் இன்று முக்கிய கட்டத்தை எட்டியது. 986 கோடி ரூபாய் செலவில் உருவாகும் இந்த ஏவுதளத்திற்கான பூமி பூஜை மற்றும் அடிக்கல் நாட்டு விழாவை இஸ்ரோ தலைவர் வி. நாராயணன் தொடங்கி வைத்தார்.
2024 பிப்ரவரி 28ஆம் தேதி பிரதமர் நரேந்திர மோடி அடிக்கல் நாட்டிய இந்தத் திட்டம், 2233 ஏக்கரில் விரிவடைகிறது. குலசேகரப்பட்டினம் ஏவுதளத்தின் மூலம் அதிகபட்சம் 500 கிலோ எடை கொண்ட ராக்கெட்டுகளை விண்ணில் ஏவ இயலும் என இஸ்ரோ தலைவர் கூறினார்
ஸ்ரீஹரிகோட்டாவில் தற்போது இரண்டு ஏவுதளங்கள் செயல்படுகின்றன. அங்கு ரூ.4000 கோடி மதிப்பில் மூன்றாவது ஏவுதளமும் கட்டி வரப்படுகிறது. இதற்கிடையில், குலசேகரப்பட்டினம் ஏவுதளம் செயல்பாட்டிற்கு வந்தால், இந்திய விண்வெளி ஆராய்ச்சி வரலாற்றில் முக்கிய முன்னேற்றமாக இருக்கும் என்று அவர் வலியுறுத்தினார்.
மேலும், சுபான்சு சுக்லா 18 நாட்கள் விண்வெளியில் தங்கி வந்ததைத் தொடர்ந்து, 2026 ஆம் ஆண்டு இறுதிக்குள் எந்திர மனிதனை விண்வெளிக்கு அனுப்பும் திட்டமும் செயல்படுத்தப்படும் எனவும் தெரிவித்தார்.விழாவில் இஸ்ரோவின் மூத்த அதிகாரிகள் ராஜராஜன், பத்மகுமார், ஆசீர் பாக்கியராஜ் உள்ளிட்டோர், தூத்துக்குடி மாவட்ட ஆட்சியர் க.இளம்பகவத், எஸ்.பி. ஆல்பர்ட் ஜான், வன அலுவலர் ரேவதி ரமன், பல்வேறு அரசுத் துறை அதிகாரிகள் கலந்து கொண்டனர்.
.
