தூத்துக்குடி 2023 டிசம்பரில் தூத்துக்குடி மாவட்டத்தில் ஏற்பட்ட வரலாறு காணாத பெருவெள்ளத்தின் போது, தன் உயிரைப் பணயம் வைத்து 12 சிறுவர்கள், 30 பெண்கள், ஒரு கர்ப்பிணி உட்பட மொத்தம் 48 பேரைக் காப்பாற்றிய மணல்குண்டு பகுதியைச் சேர்ந்த இளைஞர் லிமின்டனின் வீரச் செயல் மீண்டும் பேசுபொருளாகியுள்ளது.

2025-ஆம் ஆண்டுக்கான அரசு விருதுப் பட்டியலில் லிமின்டனின் பெயர் இடம்பெறாதது வருத்தமளிப்பதாக, தூத்துக்குடி தெற்கு மாவட்ட பாஜக தலைவர் சித்ராங்கதன் தெரிவித்துள்ளார்.

இந்நிலையில், சென்னை ராஜ்பவனில் நவம்பர் 24 நடைபெற்ற உலக மீனவர் தின விழாவில், தமிழ்நாடு ஆளுநர் ஆர்.என்.. ரவி அவர்கள் லிமின்டனை நேரில் அழைத்து, சால்வை அணிவித்து, பாராட்டு சான்றிதழ் வழங்கி கவுரவித்தார். மாநில ஆளுநரிடமிருந்து கிடைத்த இந்த அங்கீகாரம், லிமின்டனுக்கும் தூத்துக்குடி மக்களுக்கும் பெருமை சேர்த்ததாக பாஜக சார்பில் கூறப்பட்டது. தூத்துக்குடி தெற்கு மாவட்ட தலைவர் சித்ராங்கதன் மற்றும் நிர்வாகிகள் நேற்று லிமின்டனை நேரில் சந்தித்து வாழ்த்தினர். வெள்ளத்தின்போது உயிரை பொருட்படுத்தாமல் 48 பேரைக் காப்பாற்றிய லிமின்டனுக்கு அரசு வேலை வழங்குவதுதான் உண்மையான அங்கீகாரம் எனவும், மிகவும் ஏழ்மையில் வாழும் இளைஞருக்கு அரசு வேலை உடனடியாக வழங்க முதலமைச்சர் மு க ஸ்டாலின் தலையிட வேண்டும் எனவும் சித்ராங்கதன் கோரிக்கை விடுத்துள்ளார்

.