தூத்துக்குடி மாவட்டத்தில் ஒரு இலட்சத்து எழுபதாயிரம் ஹெக்டேர் மானாவாரி நிலங்கள் உள்ளன. ஆண்டுதோறும் புரட்டாசி மாதம் பெய்யும் மழையை நம்பியே உளுந்து, பாசி, கம்பு, மக்கா, வெள்ளைச் சோளம், சூரியகாந்தி, கொத்தமல்லி, வெங்காயம், மிளகாய் போன்ற பல்வேறு பயிர்கள் பயிரிடப்படுகின்றன. அரசு விவசாயிகளுக்கு உதவும் வகையில் பல்வேறு திட்டங்களை செயல்படுத்தி வருகிறது.

பாசன நிலங்களான ஆற்றுப் பாசனம், நன்செய் பாசனம், கிணற்றுப்பாசனங்களில் கரைசல் மற்றும் களிம்பு உரங்களும், விதைகள் மற்றும் நாற்றுகளும் பயன்படுத்தி சாகுபடி செய்யப்படுகின்றன. ஆனால் மானாவாரி நிலங்களில் உலர் உரங்கள் மற்றும் விதைகள் தூவி சாகுபடி செய்யப்படுகிறது. வரவிருக்கும் புரட்டாசி முதல் வாரத்தில் மானாவாரி நிலங்களில் விதைப்பு செய்ய விவசாயிகள் தயாராகி வருகின்றனர்.

மக்காச்சோளம் விதைகள் இல்லை:

இந்நிலையில் தனியார் உரக்கடைகளில் அடி உரம் டிஏபி, மேலுரம் யூரியா மற்றும் விதைகள் முன்கூட்டியே வந்து விட்டன. வசதி உள்ள மற்றும் வாடிக்கை விவசாயிகளுக்கு உரங்கள், விதைகள் வழங்கப்பட்டு வருகின்றன. பெரும்பாலான விவசாயிகள் அவரவர் கிராமங்களில் செயல்படும் தொடக்க வேளாண்மை கூட்டுறவு கடன் சங்கங்களில் பயிர்க்கடன் பெற்று டிஏபி, யூரியா வாங்குகின்றனர். வேளாண்மை விரிவாக்க மையங்களில் உளுந்து, பாசி, சூரியகாந்தி விதைகள் இருப்பில் உள்ளன.மழை பெய்தவுடன் முதல் விதைப்பாக மக்காச்சோளம், உளுந்து, பாசி, பருத்தி விதைப்பது வழக்கம். சூரியகாந்தி மழைக்காலம் முடிந்து மார்கழி பனி மாதத்தில் விதைக்கப்படுகிறது. ஆனால் முதலில் விதைக்க வேண்டிய மக்காச்சோளம் எந்தவொரு வேளாண்மை விரிவாக்க மையங்களிலும் கிடைக்கவில்லை.

மேலும் தமிழக வேளாண்மை துறையின் மூலம் ஒவ்வொரு வேளாண் விரிவாக்க மையங்களுக்கும் ரூ.40 லட்சம் பெறுமதியான கடல்பாசி உரங்கள் அனுப்பப்பட்டுள்ளன. 20 கிலோ கொண்ட கடல்பாசி களிம்பு உரம் ரூ.3,000 மதிப்பில், 50% மானியத்தில் ரூ.1,500 க்கு வழங்கப்படுகிறது. இந்த உரம் ஈரத்தன்மை உடையதால் பாசன வசதி உள்ள நிலங்களில் மட்டுமே பயன்படுத்த இயலும். ஆனால், அதை மானாவாரி விவசாயிகளுக்கும் வழங்குவது சிக்கல் தரும் நடவடிக்கையாக உள்ளது.

விவசாயிகள் கடுமையாக எதிர்ப்பு:

மாவட்டத்தில் தொடக்க வேளாண் கூட்டுறவு சங்கங்களில் அடிப்படை உரமான டி.ஏ.பி. உரமே இல்லாத நிலையில், மானாவாரி நிலங்களுக்கு உலர் உரங்கள் வழங்காமல் கடல்பாசி உரம் வழங்கப்படுவதை விவசாயிகள் கடுமையாக எதிர்க்கின்றனர்.

அதேபோல் கடந்த ஆண்டு வரை நிலப் பட்டா அடிப்படையில் ஒரு வருடத்திற்கு ரூ.1.60 லட்சம் வரை அடமானமின்றி, வட்டியில்லா கடன் வழங்கப்பட்ட நிலையில், இந்த ஆண்டு முதல் ரூ.3 லட்சம் வரை வழங்கப்படும் என மத்திய–மாநில அரசுகள் அறிவித்துள்ளன. இந்தத் திட்டம் உடனடியாக அமல்படுத்தப்பட வேண்டும் என்றும், மானாவாரி நிலங்களுக்கு கடல்பாசி உரத்திற்கு பதிலாக உலர் உரங்களை வழங்க மாவட்ட நிர்வாகம் நடவடிக்கை எடுக்க வேண்டும் என்றும் அ.வரதராஜன் வலியுறுத்தியுள்ளார்.