தஞ்சாவூர் திமுக மகளிர் அணி சார்பில் திமுக மாநில, மாவட்ட, மாநகர மகளிரணி, மகளிர் தொண்டரணி அமைப்பாளர்கள், மாநில பிரச்சாரக்குழு, சமூக வலைத்தளக் குழு மற்றும் ஆலோசனைக் குழு நிர்வாகிகள் ஆலோசனைக் கூட்டம் நேற்று (20/09/2024) தஞ்சாவூர் ஜெயராம் மஹாலில் நடைபெற்றது. இந்த ஆலோசனைக் கூட்டத்திற்கு திமுக துணைப் பொதுச் செயலாளரும், நாடாளுமன்ற குழுத் தலைவருமான கனிமொழி கருணாநிதி தலைமை தாங்கி சிறப்புரையாற்றினார்.

இக்கூட்டத்தில், அமெரிக்க நாட்டிற்குச் சென்று பல்வேறு தொழில் நிறுவனங்களுடன் ஒப்பந்தம் மேற்கொண்டு வேலை வாய்ப்பை அதிகரிக்க முயற்சிகளை முன்னெடுத்த முதலமைச்சருக்குப் பாராட்டு தெரிவித்தும், திமுக அரசின் சாதனைகளை மகளிர் அணியினர் வீடு வீடாகக் கொண்டு சென்று வரும் 2026 ஆம் ஆண்டு மீண்டும் முதலமைச்சரின் திராவிட ஆட்சி தொடர உறுதி ஏற்க வேண்டும் உள்ளிட்ட தீர்மானங்கள் நிறைவேற்றப்பட்டன.

இந்த ஆலோசனைக் கூட்டத்தில், ஆதிதிராவிடர் நலத்துறை அமைச்சர் கயல்விழி செல்வராஜ், திமுக மாநில மகளிர் அணி தலைவர் விஜயா தாயன்பன், திமுக மாநில மகளிர் அணி செயலாளர் ஹெலன் டேவிட்சன், திமுக மாநில மகளிர் தொண்டர் அணி செயலாளர் நாமக்கல் ப. ராணி, திமுக மாநில மகளிர் அணி இணைச் செயலாளர்கள், திமுக மாநில மகளிர் தொண்டர் அணி இணைச் செயலாளர்கள், மாநில பிரச்சாரக்குழு நிர்வாகிகள், சமூக வலைத்தளக் குழு நிர்வாகிகள், மாவட்ட மகளிர் அணி அமைப்பாளர்கள் & மாவட்ட தொண்டர் அணி அமைப்பார்கள் உள்ளிட்ட பலர் கலந்துகொண்டனர்.

இந்நிகழ்வில் பேசிய கனிமொழி கருணாநிதி எம்.பி:

இந்த ஆலோசனைக் கூட்டத்திற்கு மகளிர் அணியை சார்ந்த நிறைய பேர் கலந்து கொண்டிருக்கிறீர்கள், அதற்கு என்னுடைய மகிழ்ச்சியை தெரிவித்துக் கொள்கிறேன். நம்முடைய திமுக மாநில மகளிர் அணி செயலாளர் ஹெலன் டேவிட்சன், திமுக மகளிர் தொண்டர் அணி செயலாளர் நாமக்கல் ப. ராணி அவர்கள் எல்லா மாவட்டங்களுக்கும் சென்று மகளிர் அணி நிர்வாகிகள், தொண்டர்களைச் சந்தித்து மிகச் சிறப்பாக இந்த ஆலோசனைக் கூட்டத்தை நடித்துக் கொண்டிருக்கிறார்கள். தமிழ்நாட்டில் இருக்கக்கூடிய மாவட்டங்களை ஐந்து மண்டலமாக பிரித்து, மண்டலத்திற்கு ஒரு பொறுப்பாளர்களை நியமித்திருக்கிறோம். முழு விவரத்தைத் தலைமை கழகம் அறிவித்தார்கள். ஒவ்வொருவரும் உங்களுக்குத் தரப்பட்ட பொறுப்பை உணர்ந்து செயல்பட வேண்டும் என்று கேட்டுக்கொள்கிறேன்

மகளிர் அணி சார்ந்த நிர்வாகிகள் தொடர்ந்து பல நிகழ்ச்சிகளை நடத்த வேண்டும், தொடர்ந்து மக்களைச் சந்திக்க வேண்டும், இதுதான் நமக்கு தரப்பட்ட முக்கிய பொறுப்பு. மக்களுடைய பிரச்சினைகளைத் அடையாளம் கண்டு, அதனை சரி செய்து தர வேண்டும். இன்றைக்கு இருக்கக்கூடிய சூழலில் நம்முடைய இயக்கத்துக்கு எதிராக, எதிர் கருத்து உடையவர்கள், நம்முடைய திராவிட சிந்தனைகள், பகுத்தறிவு, சுயமரியாதை, சமூக நீதியை ஓழித்து கட்ட வேண்டும் என்ற எண்ணத்தோடு இருக்கிறார்கள். தமிழ்நாட்டில் மட்டும் இல்லை, இந்த நாடு முழுவதும் இப்படிப்பட்ட சூழலை நாம் பார்த்துக் கொண்டிருக்கிறோம்.

ஒடுக்கப்பட்ட, ஒதுக்கப்பட்ட மக்கள் அவர்கள் ஒடுக்கப்பட்டவர்களாகவே வாழ வேண்டும் என்று நினைக்கக்கூடிய ஒரு ஆட்சி ஒன்றியத்தில் நடைபெற்றுக் கொண்டிருக்கிறது. தமிழ்நாட்டில் அவர்களின் வேலையை தொடங்கி இருக்கிறார்கள். நல்லவர்களைப் போல, மக்கள் பிரச்சனை பேசக்கூடியவர்கள் போல, மக்கள் மீது அக்கறை இருப்பது போல, அதுவும் மதத்தின் பெயரால், ஜாதியின் பெயரைச் சொல்லி மக்களை அணுகி பணியாற்றிக் கொண்டிருக்கிறார்கள். நாம் அத்தனை பேரும் அறிவோம் அவர்கள் தொடர்ந்து முன் வைக்கக் கூடிய விஷயங்கள் பகுத்தறிவுக்கு எதிரான விஷயம், பெண்களுக்கு எதிரான விஷயம், மனித இனத்திற்கு எதிரான விஷயங்கள் என்று. யாரும் சமமில்லை, ஆணும் பெண்ணும் சமமில்லை, பெண் அடிமையாகத்தான் வாழ பிறந்தவள், ஜாதி என்பது இந்த சமூக கட்டமைப்பில் இருக்கக்கூடிய ஒன்று என்ற எண்ணம் கொண்டவர்கள்.

அவர்கள் சொல்கிறார்கள், போன ஜென்மத்தில் நல்லவராக இருந்தால், இந்த ஜென்மத்தில் நன்றாக இருப்பீர்கள் என்று. இந்த ஜென்மத்தில் பாவம் செய்திருந்தால், அடுத்த ஜென்மத்தில் கஷ்டப்படுவோம் என்று கூறுகிறார்கள். இதில் அழகான புத்திசாலித்தனமான விஷயம் என்னவென்றால், இந்த ஜென்மத்தில் நல்லா இருந்தீங்கன்னா, நல்லது செய்து நன்றாக இருப்பீர்கள் என்று சொன்னால் நம் கண்களால் பார்க்க முடியும். ஆனால், நீ போன ஜென்மத்தில் நன்மை செய்திருந்தால், இந்த ஜென்மத்தில் பலன் கிடைக்கும் என்பது நமக்கு தெரியாது.

அடுத்த ஜென்மத்தில் நடக்கப்போவது நமக்கு தெரியாது. அதனால் என்ன கஷ்டம் வந்தாலும், துன்பம் மற்றும் அநீதி இழக்கப்பட்டாலும் அமைதியாக இருந்திருந்தால் அடுத்த ஜென்மத்தில் நல்லா இருப்பீர்கள். அப்படி என்றால் இந்த சமூகத்தில் மாற்றமே வராது.

இந்த நாட்டில் யாரும் எதிர்த்து பேசி விடக்கூடாது, அவருடைய பித்தலாட்டத்தை அம்பலப்படுத்தி விடக்கூடாது என்பதால் இப்படிப்பட்ட பொய்களைக் கட்டமைப்பு செய்கிறார்கள். சமூகத்தில் ஆண்களை விடப் பெண்களுக்குப் பகுத்தறிவு என்பது மிக முக்கியமான விஷயம். மூட நம்பிக்கையால், மத நம்பிக்கையால் அதிகமாகப் பாதிக்கப்படுகிறவர்கள் பெண்கள் தான். ஒரு ஜாதியில் இப்படித்தான் வாழ வேண்டும் என்றால், அதனால் அதிகமாகப் பாதிக்கப்படுவது பெண்கள்தான். அதனைப் பெண்கள் உடைத்தால் ஆணவக் கொலை, ஜாதியிலிருந்து தள்ளி வைக்கிறார்கள். எத்தனையோ பிரச்சனைகளை சந்திக்க கூடிய கூடியவர்கள் பெண்கள்தான்.

பெண்கள் ஏதாவது குற்றத்தை முன் வைத்தால், முதலில் அவரிடம் கேள்வி கேட்பது நீ என்ன உடை அணிந்து இருந்தாய்? உனக்கு அந்த நேரத்தில் அங்கே என்ன வேலை? எந்த நேரத்திலும், எங்கே வேண்டுமானாலும் பெண்கள் செல்லலாம். ஒழுக்கமாக இருக்க வேண்டியது, சட்டத்திற்கு அடங்கி வாழ்வது என்பது அனைவருடைய கடமை. ஒரு பெண்ணை தவறாகப் பார்க்க கூடாது. ஒரு பெண்ணை மரியாதையாக நடத்த வேண்டும், அவர்களுடைய அனுமதியில்லாமல் பெண்களை தொடக்கூடாது என்று சொல்லி வளர்க்க வேண்டும்.

அரசியல் பணி என்று வரும்போது பெண்களுக்கு அது மிகப்பெரிய சவால்.

வீட்டில் என்ன நடக்கிறது என்பது பொதுவாக ஆண்களுக்குத் தெரியாது. ஆனால் பெண்களுக்கு குழந்தைகள், பெற்றோர்கள், வீடு என்ற அத்தனை சுமைகளையும் தாண்டித்தான் அரசியலில் செயல்பட்டு வருகிறார்கள். இதை கடக்க கூடிய காலம் வரும், அதுவரைக்கும் எத்தனை சுமைகளை தாங்கிக் கொண்டு அந்த பெண் அரசியலுக்கு வருகிறாள், எல்லாரையும் விடத் தடைகளை அதிகமாக சந்திக்கக்கூடியது பெண்களாகத்தான் இருக்கிறார்கள். இந்த தடைகளை அடுத்த தலைமுறைக்கான பெண்களுக்காக உடைக்க வேண்டும் என்றால் இதற்கு வழிகாட்டியாக நீங்கள் இருக்க வேண்டும்.

அம்மையார் ஜெயலலிதா பற்றி நாம் பேசும்போது கூட சிந்தித்துப் பேச வேண்டும் என்று சொல்லுவேன். ஏனென்றால் அவருடைய அரசியல் கருத்துக்கள் நம்மால் ஏற்றுக் கொள்ள முடியாது. ஆனால் தனிப்பட்ட முறையில் விமர்சனம் செய்தோம் என்றால் அது நமக்கான விமர்சனமாக மாறிவிடும். ஒரு பெண் எங்கே இருந்தாலும் தனிப்பட்ட விமர்சனத்தை, காழ்ப்புணர்ச்சியை யார் செய்தாலும், நாம் அதை எதிர்த்து நிற்க வேண்டும்.

எல்லோருக்கும் வாழ்க்கையில் சிறு சிறு பிரச்சனைகள் வரும் அதனை நாம் நேரடியாக உட்கார்ந்து பேசி சரி செய்து கொள்ளலாம். ஒவ்வொரு பெண்ணும் கஷ்டப்பட்டு தான் இந்த இடத்திற்கு வந்திருக்கிறீர்கள். ஒருவருக்கும் உறுதுணையாக இருப்பது தான் நமக்கு மிக முக்கியமான ஒன்று. நம்முடைய செயலுக்காக அனைவரும் எழுந்து நின்று கைதட்டுங்கள். நமக்கென நாமே கைதட்டிக் கொள்ளலாம் என்று பேசினார்.