தமிழகத்தின் 12,480 கிராம ஊராட்சிகளில், கிராம மக்களின் தேவைகளை அறிந்து பூர்த்தி செய்வதற்காக கிராம சபை கூட்டங்கள் நடைபெற்று வருகின்றன. ஆண்டுக்கு ஆறு முறை கிராம சபை கூட்டங்கள் நடத்தப்படுகின்றன.

இதில், இன்று (அக் 11) நடைபெறும் கிராம சபை கூட்டங்களில் முதல்முறையாக 10,000 கிராம ஊராட்சிகளில் நடைபெறும் கூட்டங்களுக்கு முதலமைச்சர் மு.க.ஸ்டாலின் காணொலி காட்சி மூலம் உரையாற்றினார்.

அதில் பேசிய அவர், “நம் நாட்டின் முதுகெலும்பு கிராமங்கள்தான். காந்திஜி கூறியபடி விடுதலை இந்தியாவின் வலிமை கிராமங்களில் உள்ளது. கிராம பொருளாதாரத்தை உயர்த்தவும், நிர்வாகங்களை வலுப்படுத்தவும் பல்வேறு திட்டங்கள் மேற்கொள்ளப்பட்டுள்ளன. இத்திட்டங்கள்தான் தமிழ்நாட்டின் கிராம ஊராட்சிகளின் மேம்பாட்டிற்கு அடிப்படை. மூன்றாவது முறையாக கிராம சபை கூட்டத்தில் பங்கேற்பதில் பெருமை கொள்கிறேன்,” என்றார்.

மேலும் அவர் கூறியதாவது: “கிராம சபை கூட்டங்கள் ஜனநாயகத்தின் முக்கியத்துவத்தை உணர வைக்கும் தருணம். மக்கள் ஊராட்சி நிர்வாகத்தில் நேரடியாக பங்கேற்க உரிமை பெறுவது அரசின் நோக்கம். அதற்காக ஆண்டுக்கு 6 முறை கூட்டங்கள் நடைபெறுகின்றன. இதன் மூலம் கிராம வளர்ச்சி, நலத்திட்டங்கள், குடியிருப்பு, சாலை உள்ளிட்ட தேவைகள் தீர்மானிக்கப்படுகின்றன.

சாதி பெயர்கள் நீக்க வேண்டும்

குடியிருப்பு, தெரு, சாலை, நீர்நிலைகளில் சாதிப்பெயர்களை நீக்கி பொதுப்பெயர்கள் வழங்க நடவடிக்கை எடுக்க வேண்டும். மக்கள் விருப்பப்படி பெயர் மாற்றம் செய்யலாம் அல்லது மாறாமல் வைத்திருக்கலாம். பெயர் மாற்றம் செய்யப்பட்டால் அரசிதழ் மூலம் அறிவிக்கப்படும்.

குடிசையில்லா தமிழ்நாடு இலக்கை எட்டும் நோக்கில் இதுவரை 99,453 வீடுகள் கட்டி வழங்கப்பட்டுள்ளன. பிளாஸ்டிக் பயன்பாட்டை தவிர்க்க வேண்டும். தண்ணீரை பணம்போல் மதித்து பயன்படுத்த வேண்டும். பருவமழையை எதிர்கொள்ள ஊராட்சிகள் முன்னெச்சரிக்கை நடவடிக்கை எடுக்க வேண்டும்.

ஒவ்வொரு வீட்டிலும் குழந்தைகள் கல்வி பெறுவதை உறுதி செய்ய வேண்டும். குழந்தை தொழிலாளர் நிலை காணப்பட்டால் மாவட்ட நிர்வாகத்திடம் தெரிவிக்க வேண்டும். சுயஉதவிக்குழுக்களின் வளர்ச்சிதான் பெண்கள் முன்னேற்றத்தின் அடித்தளம். மகளிர் உதவித்தொகை மற்றும் விடியல் பயணத் திட்டங்கள் பெண்களின் வளர்ச்சிக்கு முக்கிய பங்காற்றுகின்றன,” எனத் தெரிவித்தார்.

முதலமைச்சர் உரை முடிந்ததும் கிராம சபைகளில் 16 அம்சங்கள் குறித்து விவாதம் நடைபெற்றது. இதில் உடனடியாக செய்யப்பட வேண்டிய மூன்று முக்கிய தேவைகள் தீர்மானிக்கப்பட உள்ளன. ‘நம்ம ஊரு நம்ம அரசு’ திட்டத்தின் கீழ் தீர்மானங்கள் நிறைவேற்றப்பட வேண்டும் என தெரிவிக்கப்பட்டுள்ளது.

மேலும், கிராமங்களில் ஏழ்மை ஒழிப்பு கடனுதவி திட்டம், மழைநீர் சேகரிப்பு, கொசு ஒழிப்பு, குழந்தை தொழிலாளர் ஒழிப்பு உள்ளிட்ட விவகாரங்களும் ஆலோசிக்கப்பட்டன. மத்திய அரசின் அறிவுறுத்தலின் பேரில், 7,515 கிராம ஊராட்சிகளில் நடைபெற்ற கிராம சபை கூட்டங்களின் காணொளிகள் சபாசார் இணையதளத்தில் பதிவேற்றம் செய்யப்பட உள்ளதாகவும் தெரிவிக்கப்பட்டுள்ளது.