அதிகாரிகளின் அலட்சியம் பல கோடி ரூபாய் வீண் போகிறது, தூத்துக்குடி தெற்கு மாவட்ட பாஜக தலைவர் ஆர். சித்ராங்கதன் குற்றச்சாட்டு,

தூத்துக்குடி மாவட்டம் ஸ்ரீவைகுண்டம் சட்டமன்ற தொகுதிக்குட்பட்ட ஏரல் பகுதியில் தாமிரபரணி ஆற்றின் குறுக்கே அமைந்துள்ள உயர்மட்ட பாலம், வெறும் இரண்டு மாதங்களில் மீண்டும் சேதமடைந்துள்ளது.

கடந்த 2023-ஆம் ஆண்டு ஏற்பட்ட வெள்ளத்தில் பாலம் கடுமையாக சேதமடைந்ததைத் தொடர்ந்து சீரமைப்பு பணிகள் கடந்த ஒரு ஆண்டுக்கும் மேலாக நடைபெற்றன. சீரமைப்பு பணிகள் முடிவடைந்ததாக கூறி சுமார் இரண்டு மாதங்களுக்கு முன்பு பாலம் பொதுப் பயன்பாட்டிற்கு திறக்கப்பட்டது.

ஆனால் தற்போது பெய்துவரும் சாதாரண பருவமழையிலேயே பாலத்தின் பல பகுதிகள் மீண்டும் சேதமடைந்து, வாகன ஓட்டிகளும் பொதுமக்களும் அச்சத்துடன் பயணிக்க வேண்டிய நிலை ஏற்பட்டுள்ளது.

தூத்துக்குடி மாவட்ட ஆட்சியருக்கு பாரதிய ஜனதா கட்சியின் மாவட்டத் தலைவர் ஆர். சித்ராங்கதன் மனு 

இந்த நிலையில், தரமற்ற முறையில் சீரமைப்பு பணிகளை மேற்கொண்ட நிறுவனம் மற்றும் அதற்கு உடந்தையாக இருந்த அரசு அதிகாரிகளின் மீது கடுமையான நடவடிக்கை எடுக்க வேண்டும் என தூத்துக்குடி மாவட்ட ஆட்சியருக்கு பாரதிய ஜனதா கட்சியின் மாவட்டத் தலைவர் ஆர். சித்ராங்கதன் மனு அளித்துள்ளார்.

அவர் அளித்த மனுவில், “அரசு மேற்பார்வையில் நடந்த சீரமைப்பு பணிகள் தரமற்ற முறையில் நடைபெற்றுள்ளன என்பது தெளிவாகிறது. பாலத்தில் ஏற்பட்ட சேதங்களை அவசர அவசரமாக மூடிமறைக்கும் பணியிலும் அதிகாரிகள் ஈடுபடுவது சந்தேகத்தை அதிகரிக்கிறது. இதை மாவட்ட ஆட்சியர் நேரில் ஆய்வு செய்து,    இந்தப்பணி தொடர்புடைய ஒப்பந்ததாரர்  மற்றும் அதிகாரிகளும் மீது கடுமையான நடவடிக்கை எடுக்க வேண்டும்,” என்று கூறியுள்ளார். மேலும், இது குறித்து உரிய நடவடிக்கை விரைவில் எடுக்க படவில்லை என்றால் பா.ஜ.க சார்பில் பெரிய அளவில் போராட்டம் நடத்தப்படும் என்றும் அவர் மனுவில் குறிப்பிட்டுள்ளார்.