தூத்துக்குடியில் அதிகாலை ஏற்பட்ட துயரகரமான கார் விபத்தில் 3 பயிற்சி டாக்டர்கள் பரிதாபமாக உயிரிழந்தனர். மேலும் 2 டாக்டர்கள் தீவிர காயத்துடன் சிகிச்சை பெற்று வருகின்றனர்.

கோயம்புத்தூர் பி.என். புதூர் சாஸ்திரி 1வது தெருவைச் சேர்ந்த சுந்தர்ராஜின் மகன் சாருபன் (23), புதுக்கோட்டையைச் சேர்ந்த ராகுல் ஜெபஸ்டியான் (23), திருப்பத்தூர் மாவட்டம் மந்தவெளி குறும்பேறி பகுதியைச் சேர்ந்த முகிலன் (23), தூத்துக்குடி தெர்மல் நகர் ரவிக்குமாரின் மகன் கிறிஸ்டிகுமார் (23), சரண் (23) ஆகிய ஐவர் தூத்துக்குடி அரசு மருத்துவமனையில் பயிற்சி டாக்டராக பணியாற்றி வந்தனர்.

இன்று அதிகாலை 3 மணியளவில் புதிய துறைமுகம் கடற்கரை நோக்கி காரில் சென்றபோது, சாருபன் ஓட்டிய கார் பீச் ரோட்டில் பலத்த மழை காரணமாக வழுக்கி, அருகிலிருந்த வேப்பமரத்தில் மோதி தலைகீழாக கவிழ்ந்தத ஐந்து பேரும் காருக்குள் சிக்கினர்.

அந்த நேரத்தில் அப்பகுதியில் இருந்த மீனவர்கள் அவசரமாக 108 ஆம்புலன்ஸ் மற்றும் தீயணைப்பு நிலையத்துக்கு தகவல் தெரிவித்தனர். விரைந்து வந்த தீயணைப்பு படையினர் சிக்கியிருந்த ஐவரையும் மீட்டனர். இதில் சாருபன், ராகுல் ஜெபஸ்டியான், முகிலன் ஆகிய மூவரும் சம்பவ இடத்திலேயே உயிரிழந்ததாக தெரிவிக்கப்பட்டது.

படுகாயம் அடைந்த கிறிஸ்டிகுமார் மற்றும் சரண் ஆகியோர் தூத்துக்குடி அரசு மருத்துவமனையில் அனுமதிக்கப்பட்டனர் 

சம்பவ இடத்துக்கு டவுன் ஏஎஸ்பி மதன், தென்பாகம் காவல் நிலைய இன்ஸ்பெக்டர் திருமுருகன் உள்ளிட்ட போலீசார் விரைந்து சென்று விசாரணை நடத்தினர். விபத்து தகவல் மருத்துவமனைக்கு சென்றதும் நூற்றுக்கணக்கான பயிற்சி டாக்டர்கள் மற்றும் மருத்துவகல்லூரி மாணவர்கள் அங்கு கூடினர்.

இந்த துயர சம்பவம் தூத்துக்குடி மருத்துவத்துறையினரும் பொதுமக்களும் மத்தியில் பெரும் சோகத்தை ஏற்படுத்தியுள்ளது. விபத்து குறித்து தென்பாகம் போலீசார் வழக்கு பதிவு செய்து விசாரணை நடத்தி வருகின்றனர்.