விவசாயம் செழிக்க வேண்டியும், மக்கள் நலமுடன் வாழ வேண்டியும் கலச விளக்கு வேள்வி மற்றும் 108 கஞ்சி கலய ஆன்மீக ஊர்வலம் நாகலாபுரத்தில் இன்று நடந்தது.

தூத்துக்குடி மாவட்டம், நாகலாபுரத்தில் அமைந்துள்ள “மேல்மருவத்தூர் ஆதிபராசக்தி வழிபாட்டு மன்றம்” சார்பில், விவசாயம் செழிக்க வேண்டியும், மக்கள் நலமுடன் வாழ வேண்டியும் கலச விளக்கு வேள்வி பூஜை நடந்தது. இதில், குருபூஜை, விநாயகர் பூஜையுடன் துவங்கிய விழாவில், அறுங்கோண சக்கரம் அமைக்கப்பட்டு முக்கோண வடிவிலான பிரதான யாகக்குண்டம் அமைக்கப்பட்டு கலச விளக்கு, விளக்கு வேள்விபூஜை நடந்தது.

இந்த வேள்வியை திரு.வி.க. நகர் சக்திபீட தலைவர் சக்திமுருகன் தீபம் ஏற்றி தொடங்கி வைத்தார். இதில் தூய்மை பணியாள‌ர்களுக்கு ஆடை தானம் வழங்கப்பட்டது. மேலும், மழை வளம் பெருகவும், விவசாயம் செழிக்கவும், இயற்கை சீற்றங்கள் தணியவும், மக்கள் மனித நேயத்துடன் ஒற்றுமையாக வாழவும், தொழில் வளம் பெருகவும் செவ்வாடை அணிந்த 108 பெண் பக்தர்கள் கஞ்சி கலயம் எடுத்து நாகலாபுரம் முழுவதும் ஆன்மிக ஊர்வலமாக வந்தனர். இந்த ஆன்மிக ஊர்வலத்தை வேள்விக்குழு பொறுப்பாளர் கிருஷ்ணநீலா தொடங்கி வைத்தார்.

இதைத்தொடர்ந்து அன்னைக்கு கஞ்சி வார்ப்பு நிகழ்ச்சி நடந்தது. பின்னர் பக்தர்களுக்கு அன்னதானம் வழங்கும் நிகழ்ச்சியை மன்ற தலைவர் விஜயலெட்சுமி துவக்கி வைத்தார். இவ்விழாவில், திரு.வி.க.நகர் சக்திபீட மகளிர் அணி பத்மா, முத்துலெட்சுமி, துணைத்தலைவர் மாரியம்மாள், மன்ற பொறுப்பாளர்கள் ராஜதுரை, சுப்புலெட்சுமி, கற்பகம், சோலையம்மாள், சக்திவேலம்மாள் உட்பட ஏராளமானோர் கலந்து கொண்டனர்.