சட்டவிரோதமாக பட்டாசு தயாரிப்பு

4-பேர் கைது

விளாத்திகுளம் அருகே சட்ட விரோதமாக பட்டாசு தயார் செய்த 4-பேர் கைது. வெடிமருந்து பொருட்கள் மற்றும் ஒரு மினி சரக்கு வாகனத்தை போலீசார் பறிமுதல் செய்தனர்.

தூத்துக்குடி மாவட்டம், விளாத்திகுளம் அருகே அருங்குளத்தில் சட்டவிரோதமாக பட்டாசு தயார் செய்யப்படுவதாக எப்போதும்வென்றான் போலீசாருக்கு கிடைத்த ரகசிய தகவலின் பேரில்  எப்போதும்வென்றான் எஸ்.ஐ., முருகன் தலைமையில் அந்தோணி திலிப் மற்றும் போலீசார் ரோந்து பணியில் ஈடுபட்ட போது எப்போதும்வென்றான் அருங்குளம் பகுதியை சேர்ந்த கருப்பசாமி மகன் கார்த்திக் (27) என்பவருக்கு சொந்தமான அருங்குளம் பகுதியில் உள்ள கோழிப் பண்ணையை சோதனை செய்தபோது, அங்கு விருதுநகர் மாவட்டம், ஏழாயிரம்பண்ணை சங்கரபணியாபுரம் பகுதியை சேர்ந்தவர்களான தேவராஜ் மகன் கருப்பசாமி (38), பொன்னுசாமி மகன் சதீஷ்குமார் (27) மற்றும் தேனி மாவட்டம் உத்தமபாளையத்தை சேர்ந்த லட்சுமணன் மகன் பிரதீப்குமார் (29) ஆகியோர் அரசு அனுமதியின்றி மற்றும் பட்டாசு தயாரிப்பதற்கான உரிமமன்றி சட்டவிரோதமாக வெடிமருந்து பொருட்களை வாங்கி விற்பனைக்காக பட்டாசுகள் தயாரித்து வந்தது தெரியவந்தது.

இதனையடுத்து, மேற்படி போலீசார் கார்த்திக், கருப்பசாமி, சதீஷ்குமார், பிரதீப்குமார் ஆகியோரை கைது செய்து அவர்களிடமிருந்து பட்டாசுகள் தயாரிக்க தேவைப்படும் சோடியம், சல்பர், அலுமினிய தூள் உட்பட வெடிமருந்து பொருட்களையும், பட்டாசு பொருட்களை சட்ட விரோத விற்பனைக்காக பயன்படுத்திய ஒரு மினி சரக்கு வாகனத்தையும் பறிமுதல் செய்தனர்.

இதுகுறித்து எப்போதும்வென்றான்  போலீசார் வழக்கு பதிவு செய்து விசாரணை மேற்கொண்டு வருகின்றனர்.