நேர்மை என்பது நம்பிக்கையின் தூண்; அது இல்லையெனில் உறவு நிலைக்காது.”முன்னோர் மொழிக்கேற்ப,

வாழ்ந்தவர்களும் வாழ்கின்றவர்களும் ஒரு சிலரே.. அவ்வகையில் நாமக்கல் மாவட்ட ஆட்சியர் உமா மக்களின் மனதில் நீங்கா இடம் பிடித்த  நேர்மறையான ஆட்சியர் என்று பெயர் பெற்றுவிட்டார். அவர் மாவட்ட ஆட்சியர் பொறுப்பேற்ற நாளில் இருந்து மக்கள் பணியை தொய்வின்றி செய்தார் அதேபோல் அரசாங்கம் மக்ளுக்கா ஒதுக்கீடு செய்த நல்லபல திட்டங்களை உடனே செயல்படுத்தி அதை இரவு பகல் பாராது கண்காணிக்கும் பணியை திறம்படச் செய்து மக்களின் நன்மதிப்பை பெற்றார்.

நாமக்கல் மாவட்ட ஆட்சியராக ஐஏஎஸ் அதிகாரி உமா கடந்த 2023-ஆம் ஆண்டில் பதவி ஏற்றார். நாமக்கல் மாவட்டத்தின் 16-வது மாவட்ட ஆட்சியராக அவர் பொறுப்பு வகித்தார். அடிப்படையில் மருத்துவரான உமா, தொடக்கத்தில் மருத்துவத் துறையில் தான் பணியாற்றி வந்தார். கடந்த 1995-ஆம் ஆண்டு எம்பிபிஎஸ் மற்றும் எம்டி முடித்த அவர், தமிழக அரசின் மருத்துவத் துறையில் அதிகாரியாக பணியாற்றி இருக்கிறார்.

குறிப்பாக திருநெல்வேலி மருத்துவக் கல்லூரி மருத்துவமனையில் பணியாற்றி இருந்தார். அடிப்படையில் தூத்துக்குடி மாவட்டத்தைச் சேர்ந்த இவர், சுறுசுறுப்பாகவும் பணிகளை நேர்த்தியாகவும் செய்து முடிப்பதில் வல்லவர். இதனால் பல்வேறு உயரிய பதவிகள் உமாவை தேடி வந்தன.

அந்த வகையில், கடந்த 2019 ஆம் ஆண்டில் உமா ஐஏஎஸ் அதிகாரியாக நியமிக்கப்பட்டார். தமிழகத்தில் அரசு மருத்துவர் ஒருவர் சிறப்பு பிரிவின்கீழ் ஐஏஎஸ் அதிகாரியாக பதவி உயர்வு பெற்றது இதுவே முதல் முறை என்பது குறிப்பிடத்தக்கது. மேலும் கொரோனா காலகட்டத்தில் மாநில அளவில் சென்னை வார் ரூம் கண்காணிப்பாளராக உமா ஐஏஎஸ்  செயல்பட்டார். தமிழக அரசு கொரோனா பரவலைத் திறம்பட கட்டுப்படுத்துவதில் உமா ஐஏஎஸ் முக்கிய பங்கு வகித்தார்.

அதுமட்டுமின்றி உமா நாமக்கல் மாவட்ட ஆட்சியராக பொறுப்பேற்ற பின்னர், 24 மணி நேரமும் பம்பரம் போல சுற்றி சுற்றி ஆய்வு பணியில் மேற்கொண்டார். மருத்துவமனைகளில் திடீரென ஆய்வு செய்து மருத்துவ பணியாளர்களை எச்சரித்தார்.

இதனால் பொதுமக்கள் மத்தியில் மாவட்ட ஆட்சியர் உமா அவர்களுக்கு நல்ல பெயர் ஏற்பட்டது. இது தவிர பள்ளி மாணவர்களையும் அடிக்கடி சந்தித்து ஊக்குவித்து வந்தார்.

இதனையடுத்து அவர், நாமக்கல் மாவட்ட ஆட்சியர் பொறுப்பில் இருந்து தன்னை விடுவித்துக் கொண்டு செயலாளராகத் தலைமை செயலகத்தில் பணியில் சேர உள்ளார். இதனிடையே, நாமக்கல் மாவட்ட ஆட்சியர் அலுவலகத்தில் ஆதிதிராவிடர் மற்றும் பழங்குடியினர் நலத்துறை அமைச்சர் மருத்துவர் மாதிவேந்தன், பாராளுமன்ற உறுப்பினர்கள் ராஜேஷ்குமார், மாதேஸ்வரன், அரசுத்துறை அலுவலர்கள், பொதுமக்கள், திருநங்கைகள் உள்ளிட்டோர் மாவட்ட ஆட்சியர் உமாவைச் சந்தித்து, நன்றி தெரிவித்து கலந்துரையாடினர்.

மாவட்ட ஆட்சியர் தங்களுக்குச் சிறந்த முறையில் ஒத்துழைப்பு வழங்கி பல்வேறு அரசு உதவிகளைப் பெற்று தந்ததற்கு அனைத்து தரப்பினரும் நன்றி தெரிவித்தனர்.அப்போது, திருநங்கைகள் மாவட்ட ஆட்சியருக்கு, ஆனந்த கண்ணீர் மல்க நன்றி தெரிவித்து கலந்துரையாடினர். மாவட்ட ஆட்சியரின் பல்வேறு உதவிகளைக் குறிப்பிட்டு நன்றி தெரிவித்தனர்.

மாவட்ட ஆட்சியரும் உணர்ச்சிவசப்பட்ட நிலையில், ஆனந்த கண்ணீர் மல்க அனைவருக்கும் நன்றி தெரிவித்தார்.

“எப்போது எந்த உதவி தேவைப்பட்டாலும் என்னை உடனடியாக அழையுங்கள்” என்று கூறினார்.

இந்தச் சம்பவம் நாமக்கல் மாவட்ட ஆட்சியர் அலுவலகத்தில் பெரும் நெகிழ்ச்சியை ஏற்படுத்தியது.